കോമണ്വെല്ത്ത് ഗെയിംസിന്റെ പത്താം ദിനത്തിലും ഇന്ത്യയ്ക്ക് മികച്ച നേട്ടം. ബോക്സിങ്ങില് സാക്ഷി ചൗധരിയും പ്രിയ ഗംഗാസും സ്വര്ണം നേടിയപ്പോള്, ജൂഡോ താരം ഉന്നതി ശര്മ്മ വെങ്കലം സ്വന്തമാക്കി. ഗെയിംസ് അവസാനിരിക്കെ അക്കൗണ്ടിലേക്ക് മെഡലുകള് എത്തിക്കൊണ്ടേയിരിക്കുകയാണ്. ഇടിക്കൂട്ടില്നിന്നാണ് ധാരാളമായി മെഡല് എത്തുന്നത്.
വനിതകളുടെ 51 കിലോഗ്രാം ബോക്സിങ് ഫൈനലില് ഇംഗ്ലണ്ടിന്റെ റൂബി വൈറ്റിനെ 5-0 എന്ന സ്കോറിന് ഏകകണ്ഠമായി പരാജയപ്പെടുത്തിയാണ് സാക്ഷി ചൗധരി സ്വര്ണം കരസ്ഥമാക്കിയത്. മത്സരത്തിലുടനീളം എതിരാളിയുടെ ആക്രമണങ്ങളെ പ്രതിരോധിച്ച് മികച്ച കൗണ്ടര് പഞ്ചുകളിലൂടെ സാക്ഷി ആധിപത്യം പുലര്ത്തി. വനിതകളുടെ 60 കിലോഗ്രാം ഫൈനലില് കാനഡയുടെ മേരി-ബാത്തുള് അല്-അഹമ്മദിയയെ 4-1 എന്ന സ്പ്ലിറ്റ് തീരുമാനത്തില് മറികടന്നാണ് പ്രിയ ഗംഗാസ് രാജ്യത്തിനായി മറ്റൊരു സ്വര്ണം നേടിയത്. കടുത്ത പോരാട്ടം കണ്ട ഫൈനലിനൊടുവിലാണ് ഇന്ത്യയുടെ നേട്ടം. ഇതിനുമുമ്പ് നടന്ന പ്രീതി പവാര്, ജാസ്മിന് ലംബോറിയ എന്നിവരുടെ സ്വര്ണനേട്ടങ്ങള്ക്ക് പിന്നാലെ, ഈ ഗെയിംസില് ബോക്സിങ്ങില് ഇന്ത്യ നേടുന്ന നാലാമത്തെ സ്വര്ണമെഡലാണിത്.
ജൂഡോയില് വനിതകളുടെ 63 കിലോഗ്രാം വിഭാഗത്തിലാണ് ഉന്നതി ശര്മ്മ വെങ്കലം നേടി ഇന്ത്യയുടെ അഭിമാനമായത്. വെങ്കല മെഡല് പോരാട്ടത്തില് ദക്ഷിണാഫ്രിക്കയുടെ സ്കൈ നോസ്റ്ററിനെ വെറും 1 മിനിറ്റും 7 സെക്കന്ഡും കൊണ്ട് കീഴ്പ്പെടുത്തിയാണ് ഉന്നതി നേട്ടം കൊയ്തത്.
content highlights: Commonwealth Games: Gold Medals for Sakshi and Priya in Boxing